लुट्ने प्रयास गर्ने दुई जना प्रहरीको फन्दामा

नवलपरासी ।

पश्चिम नवलपरासीको सुस्ता गाउँपालिका वडा नं. ४ नर्सही नारायणी नदीको ठोकर नं. १२ मा हातहतियार सहित दुई जना पक्राउ परेका छन् । शुक्रबार राति ९ बजे नर्सही स्थित ठोकर संख्या नं. १२ नजिकबाट सुस्ता ४ नर्सही जर्लैया बस्ने करिब ४७ वर्षीय आस बहादुर गुरुङ्ग र सोही ठाउँ बस्ने करिब ४६ वर्षीय नरेश गुरुङ्ग पक्राउ परेका हुन् ।

कुडियाबाट रतनगंज तर्फ जाँदै गरेको लु १ त ५८३० नम्बरको ईन्धन बोकेको पिकअपलाई रोकेर उनीहरुले चालकलाई खुकुरी देखाई धम्काएपछि चालकले स्थानीय नर्सही प्रहरीलाई खबर गरेका थिए । नर्सही प्रहरीले इलाका प्रहरीलाई खबर गरेपछि इलाका प्रहरीको टोलीले तुरुन्तै घटनास्थलमा पुगेर खोज तलास गरी घटनामा संलग्न गुरुङ्गद्वयलाई खुकुरीसहित पक्राउ गरेको ईलाका प्रहरी कार्यालय बेलाटारीका प्रहरी निरीक्षक खुमानन्द पाण्डेले जानकारी दिए । पक्राउ परेका दुबै जनालाई ईलाका प्रहरी कार्यालयले नियत्रणमा राखी थप अनुसन्धान गरिरहेको प्रहरीले जनाएको छ । दुबै जनाले अाफ्नो मुख कालो पट्टीले बाधेका थिए भनेर स्थानिय अशोक ठाकुरले बताए ।